Velni nerro cilvēkus

From Pasakas un teikas
Jump to: navigation, search

Vacu-vacūs laikūs vīnam zemnīkam par juo lobu dorbu, muižinīks īdevja desmit desetiņu zemes un taipat naudas, par kū pastatīt ustobu. Zemnīks cīši beja prīcīgs, un suoka taisīt sev ustobu. Ilgi taisīja zemnīks sovu ustobu un golu golā jam jau vajadzēja likt jumtu, un zemnīks ar vysu sovu saimi īguoja dzeivuot itymā ustobā. Dzeivoj zemnīks un taisa jumtu. Vīnu dīnu, jau vokorā, jis pabeidzja dorbu un aizguoja gulātu. Naktī zemnīks klausuos: nazkas struodoj uz jumta. Jis pasacēļa un izguoja uorā pasavārtūs, bet nikur nikuo naredzēja. Otkon zemnīks īguoja ustobā un aizguoja gulātu. Napuorguoja pusstundes, vēļ nazkas uz jumta struodoj. Kū darīt zemnīkam? Tai jis sagaidīja reita un redz, kai jis struoduoja, tai vyss stuov. Aizīt zemnīks pi baznīckunga un izstuosta jam, ka juo jaunuo ustabā baida. Baznīckungs tyuleņ pajēmja katliņu ar svētītu yudeni un aizguoja pi zemnīka. Zemnīka ustobā baznīckungs suoka lyugt Dīvu un svētīt ar svētītu yudeni vysas sīnas. Tai baznīckungs puorsvētēja un reizē ar saiminīku lykuos gulēt naktī tymā ustobā. Naktī jī dzierd: nazkas atkon staigoj pa ustobu un pa vysim koktim lej yudeni. Baznīckungs pacēļa golvu un runoj: "Svētej, Kungs Jēzus Kristus! Naškeists gors, puorstuoj tu jūkus taisīt!" Lai baznīckungs runuoja kai runuodams, bet nikuo navarēja izdarīt, kab puorstuotu — vys nazkas lej yudeni ustobā. Baznīckungs pasacēļa, aizdedzja guni, suoka skaitīt puotorus vēl ar svētītu yudeni apkristīja ustobu un aizguoja gulātu. Napuorguoja desmit minutu, baznīckungs dzierd, ka nazkas klusiņam runoj: "Kungs Jezus, svētej!" — un izlēja pylnu spaini solta yudeņa baznīckungam uz golvas, tad satvēŗa baznīckungu aiz kuojom un volkoj pa ustobu. Volkuoja, volkuoja baznīckungu pa ustobu, izvylka uorā un pametja. Baznīckungs cīši nūsabeida un vīnuos zamejuos drēbēs aizskrēja uz sovu sātu. Zemnīks redz, ka ustobā navar dzeivuot, pajēmja izjaucja itū ustobu un pataisija ūtrā vītā ustobu un suoka tur dzeivuot. Vairuok juo nikas nabīdynuoja, bet baznīckungs leidz šai dīnai beistas pi tuo zemnīka gulēt.

Personal tools
Namespaces

Variants
Actions
Navigation
Project
Categories
Add
Tools
Toolbox