Naudu saņem tas, kam tā nolemta

From Pasakas un teikas
Jump to: navigation, search

Vīnu reiz Juoņa dīnos naktī treis puiši sasarunuoja īt naudas maklātu. Trešais beja gudruoks, un kad pi juo atguoja un vajadzēja īt naudas roktu, soka: "Es naīšu, ejit jyus divi!" Tī divi puiši pajēmja luopstas un aizguoja, bet par nagaru laiciņu ari trešais guoja pakaļ. Naudas maklātuoji pīguoja pi daudzynuotuo akmeņa, ka zam tuo akmeņa Juoņa dīnas naktī varūt atrast naudu, atvēļa akmeņi un suoka rakt. Jau ruoduos: te pat nauda byus, bet izrakt navar. Trešais puiss stuovēja par gobolu un redzēja, kai ap racējim doncuoja apkuort uozis un kad racēji roka, vvs lyka prīškā sovus rogus. Tys uozis beja valns, kuram vajadzēja naudu sorguot. Roka, roka puiši un, nūsaspļuovuši, aizguoja uz daudzynuotū bārzu, ka zam tuo saknem asūt nauda. Puiši guoja uz bārzu, bet uozis, ap jīm lumstīdamīs, guoja leidza, bet puiši tuo naredzēja. Trešais puiss pīguoja pi akmeņa, drusku ar rūkom pakosa un izjēmja katliņu ar zalta naudu. Racēji pīguoja pi bārza un otkon suoka rakt, bet uozis vys gryudja luopstom prīškā rogus. Jau, ruoduos, nauda te pat skaņ ap luopstom, bet izrakt navar. Nūsaspļuovja racēji un aizguoja uz daudzynuotū ūzulu. Trešais puiss, kur stuovēja par gabaliņu nu bārza, redzēja uoža viltību un pīguojis pi jau paroktuos dūbītes zam bārza saknem, izjēmja ūtru katliņu ar zalta naudu. Racēji aizguoja pi ūzula un suoka rakt, bet uozis ar sovim rogim vys maisīja rakt. Puiši nūsaspļuovja un guoja uz sātu. Ari uozis prīcīgs lumstījuos ap jīm, ka izsorguoja naudu, bet trešais puiss pīguoja pi ūzula, izjēmja trešū katliņu ar zalta naudu un prīcīgs aizguoja uz sātu. Pēc nailga laika jis iztaisīja lobas muojas, apsaprecēja un dzeivoj ar sīvu, bet nikam nasoka par naudas atrasšonu. Jau puiss ar sīvu puordzeivuoja divpadsmit godu, bet nivīns cyts, kai tik jis, nazynuoja nu kuo puiss palyka boguots. Vīnu reizi sīva soka veiram: "Veiriņ, jau divpadsmit godu es ar tevi nūdzeivuoju, bet tu man naesi pasacījis, nu kuo tu palyki boguots. Ļauds runoj šai un tai, bet pasoki tu man vysu taisnību!" Veirs izstuostīja sīvai nu gola leidz golam, kai jis palyka boguots un apmuonēja divējus racējus un valnu. Kai tik veirs izstuostīja, aiz lūga nazkas najaukā bolsā aizaklīdzja: "Atdūd mums katliņus! Mani jau divpadsmit godu šausta ar dzelža reikstem par naudas nanūsorgošuonu!" Veirs pajēmja tukšus katliņus, izsvīdja pa durovom uorā un valns, katliņus pagyvis, prīcīgs aizskrēja uz elni, bet veirs ar sīvu leidz myuža golam nūdzeivuoja laimīgi.

Personal tools
Namespaces

Variants
Actions
Navigation
Project
Categories
Add
Tools
Toolbox