Raganas vajā cilvēkus

From Pasakas un teikas
Jump to: navigation, search

Vīnā vecine, D. Duorte, daīt pi spoveds un stuosta baznīckungam, ka šei asūte izdarējusi lelu zaudījumu vīnai atraitei. "Kaidu tu zaudījumu izdarīji atraitei?" vaicoj baznīckungs. "Es ītaisiju vīnai atraitei tai, lai jai nūspruogst gūvs un tei gūvs nūspruoga," atsoka Duorte. Baznīckungs brosnej spovedēt, pasoka jai, lai aizīt uz plebaniju pi juo pasarunuot. Sīvīte aizīt pi baznīckunga, jis vaicoj: "Kai tu tai varūte ītaisit?" A jei soka šai, kod nu sīnas pīns tecēšūt. "Nu paruodi man, kai nu sīnas var tecēt pīns!" prosa baznīckungs. Vecine pajem tutynu, īsprauž sīnā, nazkū pašveikst un nu sīnas suoc tecēt pīns. Baznīckungs breinuojas un natic pats sovom acim, ka jis redz pa tutyna spolu pīnu takūt. Suokumā tecēja pīns, vēļuok suoka tecēt asns. "Es vilkšu tutynu nu sīnas uorā," soka vecine, "jau tak asns un gūvs dreiži byus beigta." — "Nikas," atsoka baznīckungs, "lai beidzas vīn, es tam cylvākam samoksuošu par gūvi." Kad iztak asns, tod jei soka: "Tagad taidam un taidam saimnīkam ir beigta gūvs." Baznīckungs līk pasaukt tū saimnīku, kuram būrinīca aptaisīja gūvi, un prosa, voi ir nūspruoguse gūvs. Tys atsoka, ka tikkū nūspruoguse. Baznīckungs saiminīkam tyuliņ samoksoj par gūvi, a būrinīcu suoc stypri lomuot. Tei būrinīca par dusmem aptaisa baznīckungu, jis sajyuk pruotā. Vecine soka, lai labi pasalyudzūt juos, tod šei attaisīškūt, byušks vasals. Kas tū tev devis — baznīckungam būrinīcas lyugtīs! Jis tev ticēs svešīm dīvim! Jis juos kai nasalyudzja, tai i šūdin staigoj sajucis pruotā, a byutu paprasījis, i vasals palyktu. Redz kū tuos rogonas, plāškotuojas var cylvākam padarīt, taidas vajadzēja nūgyut un pakuort sausa kūka viersyunē.

Personal tools
Namespaces

Variants
Actions
Navigation
Project
Categories
Add
Tools
Toolbox